Í ár verður Fáskrúðsfjarðarhlaupið haldið föstudaginn 27. júlí - takið daginn strax frá! Hlaupið verður með svipuðu sniði og í fyrra. Við hlaupum út með norðurströnd fjarðarins og tvær vegalengdir verða í boði, 21km og 10km. Í hálfa maraþoninu er hlaupið út að Kolfreyjustað og til baka en í 10km hlaupinu verður snúið við nálægt Brimnesi. Tímataka verður á báðum vegalengdum.

Spennandi er að fylgjast með hvar Franski spítalinn verður föstudaginn 27. júlí í ár en haustið 2010 var hann færður úr Hafnarnesi inn í Búðakauptún. Í fyrra ræstum við hlaupið frá spítalanum þar sem hann stóð innarlega í þorpinu. Nú er unnið að endurgerð og uppbyggingu spítalans og kemur hann til með að standa nálægt þeim stað sem hann var upphaflega reistur á í þorpinu. Hvort hann verður kominn á sinn endanlega stað í júlí er þó óvíst en hlaupið verður ræst sem næst spítalanum, hvar sem hann verður.

Myndir úr hlaupinu eru komnar inn á Fáskrúðsfjarðarsíðuna - sjá: http://faskrudsfjordur.123.is/album/default.aspx?aid=210683
Einnig verða settar myndir hér á þessa síðu innan skamms.

Fáskrúðsfjarðarhlaupið var haldið í fimmta sinn föstudaginn 22. júlí 2011. 

Sá merki áfangi náðist sl. haust að Franski spítalinn var fluttur frá Hafnarnesi við sunnanverðan Fáskrúðsfjörð og inn í þorpið. Nú stendur hann innarlega við Hafnargötuna og bíður þar endurgerðar. Því var í ár hlaupin ný leið og tvær vegalengdir í boði, 10 og 21,1 km. Hlaupið var út með norðurströnd fjarðarins og sneru þátttakendur í 10 km við nærri Brimnesi en þeir sem hlupu hálft maraþon sneru við rétt utan við Kolfreyjustað. Veður var gott og sólríkt en hafgola og brekkur reyndu á þol hlauparanna. Í ár voru tæplega 40 þátttakendur, 17 hlupu af stað í 10 km og 18 hlupu 21 km. Að auki var ein hlaupasveit með þremur ungum drengjum og skiptu þeir 10 km leiðinni á milli sín. Að venju var Guðmundur Hallgrímsson yfirtímavörður en Gunnar Guðmundsson sonur hans var honum til aðstoðar. Myndasmiður hlaupsins í ár var Jónína G. Óskarsdóttir. Fjölskylda og vinir sáu um drykkjarstöðvar og ýmsa aðra aðstoð við framkvæmd hlaupsins.

Aðal styrktaraðili hlaupsins var Loðnuvinnslan hf á Fáskrúðsfirði sem gaf hlaupurum sérmerkta boli. Powerade-orkudrykkir voru í boði Vífilfells en Samkaup-Strax á Fáskrúðsfirði bauð þátttakendum upp á hressingu að hlaupi loknu. Að auki styrktu Launafl hf á Reyðarfirði og Gláma-Kím arkitektastofa í Reykjavík hlaupið. Aðstandendur hlaupsins þakka styrktaraðilum kærlega fyrir þeirra framlag og einnig öllum þeim sem veittu aðstoð við undirbúning og framkvæmd hlaupsins.

Hlaupurum þökkum við öllum fyrir mætinguna og vonumst eftir að sjá þá aftur og enn fleiri að ári!

Eftir mikla en þolinmóða baráttu við netsamband via 3G kerfi Símans eru úrslitin 2011 svo loks komin inn hér til vinstri

Bestu kveðjur,
Birna & Bæring

Jæja þá fer hver að verða síðastur að ákveða sig, en þeir síðustu geta orðið fyrstir! Farandbikar er veittur fyrir fyrsta sæti í kvenna- og karlaflokki, einnig verðlaunapeningar fyrir fyrstu þrjú sætin og allir þátttakendur fá sérmerkta boli.

Tvær vegalengdir verða hlaupnar, 10 og 21,1 km. Minni á að hægt er að skrá hlaupasveitir til leiks. Þátttökugjald er 1000 kr í 21 km en 500 kr í 10 km og fyrir hvern meðlim hlaupasveitar. Við erum gamaldags og tökum aðeins við peningum á staðnum   Gott er að mæta tímanlega eða um kl. 16:30 við Franska spítalann við Hafnargötuna.

... og veðurspáin lofar góðu!

Nú eru aðeins  tveir dagar í Fáskrúðsfjarðarhlaupið en það verður ræst kl. 17 á föstudaginn. Frábær hlaupaleið, bæði í 10 og 21 km. Nú á bara eftir að blanda orkudrykkina - skráðu þig núna!

Skráning í Fáskrúðsfjarðarhlaupið er í fullum gangi og nú hafa álíka margir skráð sig í 10km og 21km. Við hvetjum þá - sem enn eiga eftir að skrá sig - að drífa nú í að senda póst á birnabaldurs@gmail.com og tilkynna þátttöku. Við skráningu þarf að taka fram fullt nafn, fæðingarár, símanúmer og hvora vegalengdina (10 eða 21km) á að hlaupa.

Heilt og sælt veri fólkið!

Nú hefur verið opnað fyrir skráningu í Fáskrúðsfjarðarhlaupið. Þið skráið ykkur einfaldlega með því að senda póst á netfangið birnabaldurs@gmail.com  eða hringja í síma 860-8108. Við skráningu þarf að taka fram fullt nafn, fæðingarár, símanúmer og hvora vegalengdina (10 eða 21 km) er ætlunin að hlaupa. Ef um hlaupasveit er að ræða þá þarf einnig að gefa upp nafn sveitarinnar og fjölda þátttakenda í sveit.

Hér eru svo nánari upplýsingar um Fáskrúðsfjarðarhlaupið 2011:

Almennt um hlaupið:
Fáskrúðsfjarðarhlaupið er haldið í fimmta sinn í ár í tengslum við hátíðina „Franska daga“ á Fáskrúðsfirði. Auk þess að vera heilsubót í fögru umhverfi er með hlaupinu vakin athygli á sögu og endurbyggingu Franska spítalans.

Tímasetning:
Föstudagurinn 22. júlí kl. 17. Hlaupið er ræst við Franska spítalann við Hafnargötu í Búðaþorpi í Fáskrúðsfirði.

Skráning og mæting:
Skráning á netfanginu birnabaldurs@gmail.com og mæting er við Franska spítalann við Hafnargötu kl. 16:30.

Hlaupaleið:
Hlaupið er frá Franska spítalanum við Hafnargötu og út með norðurströnd Fáskrúðsfjarðar. Hlaupaleiðin er malbikuð en möl út við vegarbrún. Tvær vegalengdir eru í boði, 21 og 10 km. Í hálfa maraþoninu er hlaupið út að Kolfreyjustað og til baka en í 10 km hlaupinu er snúið við nálægt Brimnesi.

Tímataka og drykkjarstöðvar:
Tímataka er á báðum vegalengdum. Í 10 km hlaupinu er drykkjarstöð við Brimnes (5km) þar sem snúið er við. Í hálfa maraþoninu eru þrjár drykkjarstöðvar; við Brimnes (5km), við Kolfreyjustað (10km) þar sem snúið er við og svo aftur við Brimnes (15km). Boðið verður upp á drykki og hressingu í marki að hlaupi loknu.

Verðlaun:
Verðlaun verða veitt fyrir fyrstu sæti karla og kvenna og fyrir fyrstu hlaupasveit í báðum vegalengdum. Allir þátttakendur fá stuttermabol.

Þátttökugjald:
Þátttökugjald í 21 km hlaupi er 1000 kr en 500 kr í 10 km hlaupinu og fyrir hvern þátttakanda í hlaupasveit.

Meira um hlaupið:
Í ár er Fáskrúðsfjarðarhlaupið með öðru sniði en áður. Áfram verður hlaupið frá Franska spítalanum þó spítalinn sé ekki lengur sunnan fjarðarins í Hafnarnesi. Nú stendur spítalinn við Hafnargötu í Búðaþorpi og þar verður hlaupið ræst. Sem fyrr leggjum við áherslu á að sem flestir geti tekið þátt í hlaupinu og því verður, líkt og áður, hægt að mynda hlaupasveitir á báðum leiðum. Mikið frjálsræði er í þessu sveitahlaupi, fjöldi í sveit er frjáls og sveitir sjá sjálfar um að skipta vegalengdinni á milli sín.

Öryggi:
Almennt er lítil umferð ökutækja á hlaupaleiðinni en þó eru þátttakendur minntir á að þeir hlaupa á eigin ábyrgð og hvattir til að nota skærlitan fatnað til að auka öryggi.

Styrktaraðilar:
Styrktaraðilar hlaupsins í ár eru: Loðnuvinnslan á Fáskrúðsfirði, Samkaup-Strax á Fáskrúðsfirði, Launafl á Reyðarfirði, Vífilfell hf. og Gláma-Kím arkitektastofa.

Í ár verður Fáskrúðsfjarðarhlaupið með öðru sniði en áður. Áfram verður hlaupið frá Franska spítalanum þó spítalinn sé ekki lengur í Hafnarnesi. Nú stendur spítalinn við Hafnargötu í Búðaþorpi og þar verður hlaupið ræst.

Hlaupið verður út með norðurströnd fjarðarins og tvær vegalengdir verða í boði, 21km og 10km. Í hálfa maraþoninu er hlaupið út að Kolfreyjustað og til baka en í 10km hlaupinu verður snúið við nálægt Brimnesi. Tímataka verður á báðum vegalengdum.

Sem fyrr leggjum við áherslu á að sem flestir geti tekið þátt í hlaupinu og því verður, líkt og áður, hægt að mynda hlaupasveitir á báðum leiðum. Mikið frjálsræði er í þessu sveitahlaupi, fjöldi í sveit er frjáls og sveitir sjá sjálfar um að skipta vegalengdinni á milli sín.

Þó hlaupaleiðin sé ný er hún ekki síður falleg en sú sem áður var farin. Það að hlaupa fram og til baka ætti heldur ekki að vera leiðigjarnt því útsýnið er fjölbreytt og allt annað á leið inn fjörðinn en út. Einnig skiptir miklu máli að bílaumferð á norðurströndinni er nánast engin eftir að Fáskrúðsfjarðargöngin komu til sögunnar.

Hlaupaleiðin er malbikuð en möl út við vegarbrún. Í 10km hlaupinu verður drykkjarstöð við Brimnes (5km) þar sem snúið er við. Í hálfa maraþoninu verða þrjár drykkjarstöðvar; við Brimnes (5km), við Kolfreyjustað (10km) þar sem snúið er við og svo aftur við Brimnes (15km). Að sjálfsögðu verður svo boðið upp á drykki og hressingu þegar komið er í mark.

Að lokum tek ég fram að markmið hlaupsins hafa ekki breyst og nú sem fyrr er með hlaupinu vakin athygli á sögu Franska spítalans og uppbyggingu hans í Búðakauptúni. Eins og áður er líka markmiðið að hvetja alla til að hreyfa sig reglulega og nýta okkar yndislegu náttúru til útivistar.  

Með bestu kveðju
og von um að sjá ykkur sem flest í Fáskrúðsfjarðarhlaupinu föstudaginn 22. júlí!
Birna

Jæja þá er sól farin að hækka á lofti, fólk búið að fá sínar sólarpönnsur og tími kominn til að huga að næsta hlaupasumri. Fáskrúðsfjarðarhlaupið verður haldið föstudaginn 22. júlí 2011, svo mikið er víst.

Þar sem eitt af markmiðum Fáskrúðsfjarðarhlaupsins náðist í september - Franski spítalinn var fluttur úr Hafnarnesi og inn í Búðaþorp - þá er tilvalið að hugsa um nýjar leiðir og nýjar útfærslur á hlaupinu. Við höldum hins vegar áfram að minna á Franska spítalann, að minnsta kosti þar til hann hefur verið endurgerður og fengið nýtt hlutverk í bæjarfélaginu.

Þær breytingar sem við erum helst að pæla í eru að hafa hlaupið norðan megin fjarðarins þar sem bílaumferð er nánast engin og sú leið því miklu öruggari fyrir hlaupara. Einnig erum við að hugsa um að bjóða upp á hálft maraþon (21,1 km) í ár. Okkur finnst samt mikilvægt að Fáskrúðsfjarðarhlaupið verði áfram almenningshlaup og því viljum við hafa styttri leiðir í boði líka.

Endanlegt skipulag hlaupsins kemur fljótlega í ljós en allar hugmyndir og ábendingar frá ykkur eru vel þegnar!

Ótrúlegt en satt þá er verið að flytja Franska spítalann úr Hafnarnesi inn í Búðaþorp. Það þurfti þá ekki nema FJÖGUR  Fáskrúðsfjarðarhlaup til En auðvitað ber að þakka þennan áfanga margra ára þolinmæði og bjartsýni nokkurra áhugamanna um sögu og menningu okkar Austfirðinga. Það er í öllu falli ljóst að við hlaupum ekki aftur frá Franska spítalanum í Hafnarnesi. Hins vegar munum við fylgjast vel með og styðja við endurbyggingu spítalans. Í vetur verður legið undir feldi og hugað að skipulagningu Fáskrúðsfjarðarhlaupsins 2011. Allar hugmyndir vel þegnar!

Myndir frá flutningi Franska spítalans er að finna í myndasafni hér til hægri og líka undir hlekknum Fáskrúðsfjarðarsíðan.

Þá eru komnar inn á síðuna yfir 200 myndir úr hlaupinu, smellið á flipann "Fáskrúðsfjarðarhlaupið 2010" undir "Myndasöfn". Myndirnar tók Björgvin Baldursson.

Fáskrúðsfjarðarhlaupið var haldið í fjórða sinn föstudaginn 23. júlí 2010. Úrslitin eru komin inn hér til vinstri. 

Að venju ræsti Guðmundur Hallgrímsson hlaupið. Veður var gott, sól og hlýtt en smá sunnanvindur á köflum. Hlaupið var frá Franska spítalanum í Hafnarnesi 19,3 km inn í þorpið að grunninum þar sem spítalinn stóð áður. Í ár skráðu 30 keppendur sig til leiks. Tuttugu og einn þátttakandi hljóp alla leið en einnig voru fjórar hlaupasveitir þar sem liðsmenn skiptu hlaupaleiðinni á milli sín.

Aðal styrktaraðili hlaupsins var Loðnuvinnslan hf. á Fáskrúðsfirði sem gaf létt endurskinsvesti til allra hlaupara. Einnig styrktu Samkaup-Strax Fáskrúðsfirði, Vífilfell hf. og Gláma-Kím arkitektastofa hlaupið. Aðstandendur hlaupsins þakka styrktaraðilum kærlega fyrir þeirra framlag og einnig öllum þeim sem veittu aðstoð við undirbúning og framkvæmd hlaupsins.

Í ár voru í fyrsta skipti veittir farandbikarar fyrir fyrsta sæti kvenna og karla. Bikarana gáfu hjónin Guðmundur Hallgrímsson og Dóra Gunnarsdóttir í minningu foreldra Guðmundar sem bjuggu í Hafnarnesi. Launafl hf. á Reyðarfirði gaf verðlaunapeninga í hlaupið. Við þökkum þessum aðilum kærlega fyrir.

Jæja gott fólk, þá er aðeins vika í Fáskrúðsfjarðarhlaupið! Svo nóg verði af drykkjarföngum og vestum fyrir alla þátttakendur þá væri mjög gott að allir sem ætla að taka þátt skrái sig strax. Bæði er hægt að hlaupa alla 19,3 km eða mynda hlaupasveit og skipta leiðinni. Vinsamlega skráið ykkur með því að senda póst á birnabaldurs@gmail.com eða hringið í síma 860-8108. Taka verður fram nafn og fæðingarár. Hlaupið verður ræst við Franska spítalann í Hafnarnesi kl. 17 föstudaginn 23. júlí.

Fáskrúðsfjarðarhlaupið fer fram föstudaginn 23. júlí í tengslum við Franska daga líkt og undanfarin ár. Hlaupið verður af stað kl. 17 frá Franska spítalanum í Hafnarnesi við sunnanverðan Fáskrúðsfjörð. Auk þess að vera heilsubót í fögru umhverfi er með hlaupinu vakin athygli á sögu Franska spítalans og hugmynd um flutning og endurbyggingu hans í þorpinu þar sem hann var reistur árið 1904.
Leiðin liggur eftir malbikuðum þjóðvegi meðfram ströndinni, fyrir botn fjarðarins og inn í þorpið að grunninum þar sem spítalinn stóð áður. Vegalengdin er 19,3 km og er annað hvort hægt að hlaupa alla leið eða mynda hlaupasveit og skipta leiðinni niður.
Mæting í hlaupið er við Franska spítalann í Hafnarnesi en fyrir þá sem vilja fá far suður fyrir fjörð í Hafnarnes er best að mæta kl. 16 við gamla Læknishúsið við Hafnargötu 12 í þorpinu. Þar verður hægt að sameinast í bíla.
Þátttökugjald í 19,3 km hlaupi er 1000 kr. og 500 kr. á mann í hlaupasveit. Innifalið í þátttökugjaldi er tímataka, vatn og orkudrykkir á þremur drykkjarstöðvum á leiðinni, drykkir og bananar í marki, brautargæsla og hlaupavesti fyrir þátttakendur.
Skráning: sendið póst á netfangið birnabaldurs@gmail.com eða hringið í síma 860-8108
Verðlaun: Farandbikar verður veittur fyrir fyrsta sæti karla og kvenna en frjálsíþróttahjónin Guðmundur Hallgrímsson og Dóra Gunnarsdóttir gefa bikarana í minningu foreldra Guðmundar sem bjuggu í Hafnarnesi. Verðlaunapeningar verða veittir til fyrstu hlaupasveitar.
Öryggi: Umferð ökutækja er að jafnaði ekki mikil á hlaupaleiðinni en þó er ekki hægt að treysta því að allir aki á löglegum hraða. Þrátt fyrir að framkvæmdaaðilar skipuleggi eftirlit með hlaupinu í samráði við lögreglu þá hlaupa þátttakendur á eigin ábyrgð og eru hvattir til að nota skærlitan fatnað til að auka sýnileika á þjóðveginum. Innifalið í þátttökugjaldi er endurskinsvesti.
Styrktaraðilar hlaupsins í ár eru: Loðnuvinnslan á Fáskrúðsfirði, Samkaup-Strax á Fáskrúðsfirði, Launafl á Reyðarfirði, Vífilfell hf. og Gláma-Kím arkitektastofa.
Auglýsing: Skoðið líka auglýsingu um hlaupið hér til vinstri á síðunni undir flipanum Auglýsing 2010.

Um hlaupið
Franskur spítali var reistur í þorpinu á Fáskrúðsfirði árið 1904 en var síðar fluttur suður fyrir fjörðinn í Hafnarnes. Sú hugmynd hefur komið fram að flytja hann frá Hafnarnesi og aftur inn í þorpið á grunninn þar sem hann stóð áður.
Vegurinn frá Hafnarnesi við sunnanverðan Fáskrúðsfjörð og inn í þorpið að húsgrunninum er malbikaður og 19,3 km að lengd. Þetta er mjög falleg leið meðfram ströndinni, fjallasýn og fuglar í fjöru.
Með hlaupinu er vakin athygli á sögu Franska spítalans og með þátttöku er hægt, á táknrænan hátt, að hlaupa með gamla spítalann heim á sinn upprunalega stað.

Fáskrúðsfjarðarhlaupið var haldið í fyrsta skipti í júlí árið 2007 og fylltu þátttakendur tuginn og rúmlega það. Árið 2008 voru þátttakendur 15 en í fyrra, árið 2009, tóku 39 manns þátt í hlaupinu.
Hlaupið er jafnan haldið í tengslum við bæjarhátíðina "Franska daga" sem fer fram síðustu helgina í júlí. Sumarið 2010 verður hlaupið haldið föstudaginn 23. júlí. Nánari upplýsingar verða settar inn með hækkandi sól.